كيف ممكن تكوني سوبر ماما؟

على الام المعاصرة الحفاظ على مهماها في المنزل واتجاه اولادها وزوجها وكذلك مع عملها... السؤال كيف بتلحق؟
28 أيار 2019
09:41

بيناتنا ...احنا بنحب الشخصيات الخارقة ...البطل ... الرجل المثالي وبالأخص.. المرأة والام المثالية ..يعني  "سوبر ماما" 

مثلا ... الام لازم " تحافظ  عاولادها وبيتها" لازم " تشتغل" وطبعا " تهتم بمظهرها" بس ...

مش لازم " تهتم أكثر من اللازم بمظهرها " مش لازم " تركز بالاولاد وتنسى جوزها" مش لازم "تركز بزوجها وتنسى الاولاد"

لازم ومش لازم .... المعايير الي بحطولنا إياها احنا النساء. والامهات بالذات... بتخلصششش!

 طيب شو مع كيف أنا بشوف نفسي؟

فكرتو فيها؟

.........................................................................

انا ام لولدين.. زوجة وبشتغل بوظيفة كاملة ... وعلى فكرة شغلي مش هوين

بصراحه كتير بحكولي  : " انت أم؟ ... مش مبين عليكي..!"

" نيالك كيف عندك وقت لنفسك .."

" كيف بتلحقي تشتغلي وتديري بالك عاولادك وكمان على مظهرك ...؟ "

 

لهيك.. حبيت أشاركو اليوم. كيف نهاري بكون:

نهاري ببدا الساعة 6:30 الصبح.. وبنتهي...

بالأحرى بنتهيش ...

ليش؟؟؟؟

تحضير الأولاد للمدرسة، أغراضهن فطورهن وتفاصيلهن الصغيرة..

ومن بعدها ببدا دوامي بالشغل.. وفيو لازم أعمل الامور على أحسن وجه

نص الفيديو:

لازم أروح الأولاد من المدرسة، واكيد عقلي وقلبي معهن ومتشوقه أسمع كيف كان نهارهن ...

بس بنفس الوقت لازم الحق أرجع عالشغل بسرعه لأنه الدوام ما انتهى.. وحتى بعد ما ينتهي في كمان دوام بالبيت: " تنظيف، وترتيب وغيرها وغيراتها".. وفوق كل هاد لازم الاقي وقت أقعد مع عيلتي ..!

ازا منفكر مع بعض ومنحسبها.. اديش بقضي ساعات انا او أي أم عاملة لتخدم الي حواليها عشان يحسوا انهن مركز حياتها وباول سلم أولوياتها.. ليكونوا مبسوطين ..مرتاحين وراضيين ... منكتشف انه هالمهمة بتاخد أكثر من 90% من وقتها...

واسا بدي أسال سؤال... شو بصير اذا خصصتي لنفسك ساعة وحدة بالنهار وكم ساعة إضافية بالاسبوع ...

وقت الصبح لنفسك لتشربي قهوتك ... تلبسي وتطلعي كيف انت بتحبي تكوني

وكمان شوية وقت بالليل لتقعدي مع شريكك او لتحضري مسلسلك المفضل  ...

ومش غلط شوية وقت خارج البيت لتعملي أشيا بتحبيها .. اه.. أشياء انا بحبها

 

انا بقلك شو بصير...

بتصيري تقدري تعطي أكثر... لانك مرتاحة مع نفسك وكان عندك شوية وقت لتاخدي نفس وتتواصلي شوي من ال"انا " تاعك ...ومش مهم مين انت وشو بتحبي وكيف بتحبي يكون مظهرك الخارجي ..المهم تكوني مرتاحة مع نفسك وصادقة ... والاهم ما تهملي نفسك ...

وكمان اشي... لكل حدا بقلك كيف ملحقة ... جاوبي بكل بساطة مش ملحقة لاني بالاخر انسان عادي مش super mama ولا super woman  وبقصر هون وهناك بس بعمل المكسيموم أكون مصدر سعادة لعيلتي ولنفسي

 

بيناتنا؟ انت "سوبر" كيف ما كنتي تكوني.. تخليش حدا يفهمك غير هيك.. وتقارنيش بينك وبين امك او ستك زمان.. لانه "لكل زمان مقال"..