"متخلوش مخاوفكوا توقفكم عن تحقيق احلامكم" | هاي انا وهاي قصتي

اليوم انا اول مغنية اوبرا عربية بالبلاد امتهنت المجال اشتغلت باكبر بيوت الاوبرا بالعالم بالمانيا ايطاليا وغيرها ونلت اهتمام اعلامي عالمي
31 آذار 2019
11:24

بتنقلات سريعه بين ثقافات عديده ، برامجي الموسيقيه المختلفه ، جمهوري المتعطش لكل ما هو جديد اللقاءات الصحافية وطلابي القريبين لقلبي بنتهي نهاري مع حد ادنى من الطاقه.. كل يوم باخره بكون شاكره على كل هاذا العطايا وبجرب الاقي طريقه اجدد طاقتي عشان بيتي وعائلتي بدون الاستغناء عن تلبيه كل احتياجاتهم..
هيك فييي الخص مسار حياتي في السنين الاخيره اللي بمساعدته وصلت لوين انا اليوم.

لكن.. ولا اشي كان بالساهل .. المجال الي اخترت اني اشق طريقي فيه .. دخلني في تخبط دائم .. لانه من جهة مش مألوف ببلادنا والتوعيه لاله كانت مهمه كبيره ومعقده . ومن جهة ثانية بالعالم هاد مجال مليان محترفين زيي والتنافس فيه شديد وصعب ولازم دائما تكون بمستوى عالي ومهني
.
بلشت مسيرتي بكوني من اول الاشخاص الي اهتموا بهاد الفن ببلادنا .. وبالمقابل اشتغلت على اني اكون قد المسؤولية كفاية لاثبت للعالم انه الي مكان بهالمجال حتى اقدر اجيب من عالمي وحضارتي واضيف على هاد العالم الغني والمركب.
الوحدة.. كانت من أكبر التحديات برحلتي بالذات لما بتجرب تقدم لون مش مألوف حضاريا وثقافيا بالمحيط الي انت جاي منه.
وبالمقابل انك تتدرب وتتغرب وتصول وتجول القاعات ودول العالم لحالك .. كان مهمه صعبه لكن مش مستحيله .
اليوم انا اول مغنية اوبرا عربية بالبلاد امتهنت المجال .. اشتغلت باكبر بيوت الاوبرا بالعالم بالمانيا ايطاليا وغيرها ونلت اهتمام اعلامي عالمي واسع وتجربة غنية جدا على المستوى الشخصي المهني والثقافي .
تعلمت من الحياة... اذا بدك تحلم بدك تبقى ع قد الحلم والشغف ... بدك تتعب كتير بس تنساش انه الحياة حلوة وبتسوى نستمتع بلحظات الفرح والنجاح تاعتها .. انا حلمت وحققت وبعدني بعيش الحلم وبسمحله يدق بواب جديدة ولا مرة فتحتها ..
متخلوش مخاوفكوا توقفكم عن تحقيق احلامكم ..
انا ايناس مصالحة وهاي قصتي