"صعب، بقدرش ومستحيل 3 كلمات حذفتها من حياتي" | هاي انا وهاي قصتي

انا اليوم الحجة وسيدة الاعمال الي افتتحت اول مهرجان تسوق بالبلاد صاحبة مصلحة ومديرة كليه للتاهيل المهني والتعليم الاكاديمي.
31 آذار 2019
11:20

احيانا بنكون مستسلمين للواقع وراضيين فيه.. واحيانا بتقسى علينا الظروف وبتحولنا من اشخاص عاديين محدا بسمع عنهن لاشخاص اصحاب قوة وتاثير..
انهيت صف الثامن وتزوجت بعد وقت مش طويل .. هيك كانت العادة وقتها .. وكان كل الوقت حلمي اني اكسر العادة واتعلم .. انجبت ٤ اطفال ٢ منهن كانوا من ذوي الاحتياجات الخاصة .. وظروفنا المادية وقتها كانت كثير صعبة .. كنت اطلع على اطفالي واتخيل .. كيف بدو يكون مستقبلهم ؟ وكان يتخايلي معاناتهم .. من هون تغير حلمي لحلم اخر .. اعلم ولادي احسن تعليم .. وهيك بدي مشواري مع الجهد
طبعا لانه ما كان معي شهادة تخولني اشتغل فيها .. فاعتمدت على موهبتي بالخياطة .. وهون كان اول تحدي الي.. اجمع اموالي لاشتري ماكنة خياطة .. بعد محاولات.. شريت الماكنة واشتغلت عليها وكنت انزل على السوق بس لاعرف ايش الناس بتحب وبتشتري..كنت اروح على مناطق بعيدة لحتى اشتري أدوات الخياطة والقماش واحملهن كل الطريق من باص لباص لحتى أوصل البيت .. واستمر هالجهد وقت طويل واخذ مني كثير طاقة لكنه بالمقابل عطاني كثير ..
انا اليوم الحجة وسيدة الاعمال الي افتتحت اول مهرجان تسوق بالبلاد .. صاحبة مصلحة ..ومديرة كليه للتاهيل المهني.والتعليم الاكاديمي. ادرت اكبر مجمع تجاري لاصحاب اسهم في كفر قاسم.
والدة ل ٤ شبان كلهن تعلموا وع مستقبلهن متفائلة كثير .. تيتا لاحفاد بجننوا ..
تعلمت من الحياة ان احذف ٣ كلمات من قاموس حياتي .. صعب ..بقدرش .. ومستحيل .. فالصعب بدلتها بتع تنشوف الاسهل .. بقدرش بدلتها بنحاول .. ومستحيل بدلتها بتع نجرب ..
انا الحجة عزية بدوي وهاي قصتي