"الكون بسمعلنا وبحقق شو احنا بنحس" | هاي انا وهاي قصتي

انا اليوم مديرة استوديو رياضه الأول من نوعه في منطقة تعتبر محافظة.. معيلة وحيدة لعائلة بتضم اولادي نجيب راني وريان.
26 آذار 2019
10:22

لازم نتعود من صغرنا انه الحياة مش متوقعة.. كيف بقولوا ؟ تجري الرياح احيانا بما لا تشتهي السفن؟
كانت حياتي عادية كاي امرأة عاملة وشريكة حياة.. كنت اعمل بمجال التجميل احاول اعطي النساء ثقة من خلال تجميل أنفسهن
وفي اواخر الثلاثينات صرت امرأة ارملة .. زوجي غمض عينيه وفارق الدنيا وابني اخر العنقود فتح عينيه ع الدنيا ..
عشت سنوات من الحزن والاكتئاب بعد وفاة زوجي .. وكان لازم اطلع حالي من هاي الحالة .. اذا مش عشاني فعشان ولادي.. من هناك بلشت ابحث عن اهتمامات تنسيني الم الفقدان وبجيل متأخر "يمكن بنظر كثار" .. بلشت اهتماماتي تنصب بالرياضة صرت اتمرن كتير وأشعر اني في كل مره بتمرن بخف حزني وضغطي وتزيد ثقتي بنفسي.. وهيك فوتت على عالم الرياضة والتدريب.. بجيل الأربعين.. كنت اسمع تعليقات المستغربين "رياضة؟ وبهاد الجيل؟"
انا اليوم مديرة استوديو رياضه الأول من نوعه في منطقة تعتبر محافظة.. معيلة وحيدة لعائلة بتضم اولادي نجيب راني وريان.. انسانة بتحاول تحسن نمط حياة مجتمعها عن طريق ادخال الرياضة الى نمط حياتنا لتكون جزء منها ..
علمتني الحياة انو الكون بسمعلنا وبحقق شو احنا بنحس وشو بنفكر لهيك خلي عندكو ايمان باحلامكو وفكروا فيها كثير لحتى تصير حقيقة..
انا سهاد روحانا زريق .. وهاي قصتي