"فهمت انه مش انا المختلفة انا مميزة وهم المختلفين" | هاي انا وهاي قصتي

انا اليوم انسانة رفض المجتمع يتقبلها ففتحت ايديي لنفسي.. تعلمت علم النفس والادارة وفنون المكياج وهيك فتحت صالون تزيين
24 آذار 2019
09:12

كان بيعز علي وبجرحني اشوف نظرات الشقفة بعيون الناس السخرية والتنمر من قبل الأولاد بالحارة وبالمدرسة...
الي فيي كان كوم وعدم تقبلي بين الناس كان كوم ثاني ..
ولدت مع مشكلة فالنمو والسبب جيني او بكلمات امي .. "قدري من الله"..
في البيت كنت بنت واخت عادية جدا .. متلي متل غيري اقوم بمهام البيت .. اكل وامي تطلب مني اجلي صحني وبس احكيلها اني ما بطول المجلى تحكيلي انت كبيرة دبري حالك .. واجلي صحني وانا مبسوطة..
في الشارع كنت اشوف الولاد عم يضحكوا علي اروح ابكي من حرقة ..
بتذكر الليلة الي تغيرت فيها حياتي .. ضليت ابكي على حالي ساعات.. فجأة قررت أوقف توجهت للمراي وطلعت ع حالي.. ولأول مرة بحياتي بشوف حالي متل ما انا ..
نمت وصحيت قوية ومعنوياتي بالسما .. ثقتي بنفسي كبيرة .. ما عاد تزعجني كلمات ولا ملامح حدا ... فهمت انه مش انا المختلفة انا مميزة وهم المختلفين..
انا اليوم انسانة رفض المجتمع يتقبلها ففتحت ايديي لنفسي.. تعلمت علم النفس والادارة وفنون المكياج وهيك فتحت صالون تزيين... بتدمج ما بين بوتيك ملابس وما بين جلسات "فضفضة" انا بسميها ..
ويمكن تشوفوها غريبة نظرا لظروفي.. بس انا حاملة رخصة سياقة .. اجتماعية وعدد اصحابي لا يحصى
تعلمت من الحياة انه كل خطوة بدي اعملها لازم افكر بنفسي اذا هاي الخطوة مناسبة لالي وانا حابيتها.. اتركوكوا من الناس وشو بحكوا .. واركضوا ورا احلامكوا الحياة قصيرة..
انا ايمان أبو صلاح وهاي قصتي