"الانجاز الكبير لا يقاس بالألقاب" | هاي انا وهاي قصتي

بفخر كبير وبعد اصرار وصعوبات انا اول طالبة جامعية بالنقب اخصائية اجتماعية ورئيسة قسم الرفاه بمجلس اللقية
14 آذار 2019
15:30

كنت دائما متواجدة بمحلات بحتاج تفاعل اجتماعي وقيادي.. ساعات كثير من ايام تعليمي ودراستي كنت اتبرع فيها لتعليم نساء من عشيرتنا لمحو الامية.. كل محل كنت بقدر اساهم فيه مكنتش ابخل
هاي كانت شخصيتي وانا صغيرة.. وهالشخصية رافقتني حتى لما كبرت .. كان عندي شعور داخلي اني رح اكسر الحاجز الي ما حدا غيري قدر يكسره ...
خلصت الثانوية .. وبلش كفاحي لارتياد لجامعة .. بعشيرتنا وبالنقب ككل .. مكنش مسموح للنساء انهن يدخلوا الجامعات .. بتذكر منيح الرد الي سمعته بعد الحاحي المتكرر على اهلي انهن يسمحولي اتعلم بالجامعة قالولي "تعلمي معلمة" ..
لكن اصراري ما وقف هون .. كان بدي اتعلم وبكل قوة.. لدرجة اني بأحد الايام تنكرت باللباس ورحت اقنعت معيدين بالجامعة انهن يقعنوا اهلي .. وهاد الي صار
بفخر كبير وبعد اصرار وصعوبات انا اول طالبة جامعية بالنقب.. اخصائية اجتماعية ورئيسة قسم الرفاه بمجلس اللقية ..
علمتني الحياة انه لا تغرك كلمة "اول" فالانجاز الكبير لا يقاس باللقب انما بأبعاده والابواب الي ممكن تفتحها لأشخاص اخرين..
انا شفاء صانع وهاي قصتي